श्री सरस्वती स्तोत्रम् – २
रविरुद्रपितामहविष्णुनुतं
हरिचन्दनकुङ्कुमपङ्कयुतम् ।
मुनिबृन्दगजेन्द्रसमानयुतं
तव नौमि सरस्वति पादयुगम् ॥ १ ॥
शशिशुद्धसुधाहिमधामयुतं
शरदम्बरबिम्बसमानकरम् ।
बहुरत्नमनोहरकान्तियुतं
तव नौमि सरस्वति पादयुगम् ॥ २ ॥
कनकाब्जविभूषितभूतिभवं
भवभावविभाषितभिन्नपदम् ।
प्रभुचित्तसमाहितसाधुपदं
तव नौमि सरस्वति पादयुगम् ॥ ३ ॥
भवसागरमज्जनभीतिनुतं
प्रतिपादितसन्ततिकारमिदम् ।
विमलादिकशुद्धविशुद्धपदं
तव नौमि सरस्वति पादयुगम् ॥ ४ ॥
मतिहीनजनाश्रयपादमिदं
सकलागमभाषितभिन्नपदम् ।
परिपूरितविश्वमनेकभवं
तव नौमि सरस्वति पादयुगम् ॥ ५ ॥
परिपूर्णमनोरथधामनिधिं
परमार्थविचारविवेकव िधिम् ।
सुरयोषितसेवितपादतलं
तव नौमि सरस्वति पादयुगम् ॥ ६ ॥
सुरमौलिमणिद्युतिशुभ्रकरं
विषयादिमहाभयवर्णहरम् ।
निजकान्तिविलेपितचन्द्रशिवं
तव नौमि सरस्वति पादयुगम् ॥ ७ ॥
गुणनैककुलस्थितिभीतिपदं
गुणगौरवगर्वितसत्यपदम् ।
कमलोदरकोमलपादतलं
तव नौमि सरस्वति पादयुगम् ॥ ८ ॥
त्रिसन्ध्यं यो जपेन्नित्यं जले वापि स्थले स्थितः ।
पाठमात्राद्भवेत्प्राज्ञो ब्रह्मनिष्ठः पुनः पुनः ॥
इति श्री सरस्वती स्तोत्रम् ॥
sri saraswati stotram 2