श्री सरस्वती स्तवम् (वासुदेवानन्दसरस्वती कृतम्)
जुषस्व बालवाक्यवत् स्तवं ममाम्ब भारती ।
असत्सदप्यदस्त्वयि भ्रमाद्विभाति केवले ॥ १ ॥
क्षराक्षरात्परं हि यत्त्वमेव तत्पदं ध्रुवम् ।
जले यथोर्मिबुद्बुदास्तथा त्वयीशजीवदृक् ॥ २ ॥
त्र्यधीश ओङ्कृतेऽखिलं त्वमेव चास्य मङ्गलम् ।
यदर्धमात्रमूर्जितं क्रियाविकारवर्जितम् ॥ ३ ॥
त्रिसप्तयागसाधिके सुभुक्तिमुक्तिदायके ।
स्वरार्णकारणे स्तवः स्वयं नु कैः कृतस्तव ॥ ४ ॥
प्रकाशकप्रकाशके श्रुतिश्रुतादिधारके ।
त्वमेव सर्वकारणं त्वमेव सर्वतारणम् ॥ ५ ॥
सुशक्तभक्तभावितं हि तेन सर्वथा ततम् ।
तदेव धाम ते वरं यदीक्ष्यते बुधैः परम् ॥ ६ ॥
स्थिराश्चराश्च गोचराः परत्र चा त्र वाऽम्ब ये ।
त्वदेव तत्समागमः प्रमाणमत्र चागमः ॥ ७ ॥
नमोऽस्तु ते सरस्वति ध्यवित्रि वाजिनीवति ।
प्रसीद बुद्धिचेतने स्वभक्तहृन्निकेतने ॥ ८ ॥
स्तुतैवं विष्णुजिह्वा सा प्रसन्ना सूनृतेरका ।
प्राहाविष्कृत्य चात्मानं तुष्टास्मि वरयेप्सितम् ॥ ९ ॥
सकम्बलस्य कुरु मे सहायं शम्भुगायने ।
सुस्वरत्वादि यच्छेति ययाचेऽहिः सरस्वतीम् ॥ १० ॥
वागीशाहोभयोरस्तु दिव्यनादरहस्यमित् ।
स्तोत्रं चास्तु स्खलद्गीष्ट्वधीजाड्यादिहरं त्विदम् ॥ ११ ॥
इति श्रीवासुदेवानन्दसरस्वती विरचितं श्री सरस्वती स्तवम् ॥
sri saraswati stavam vasudevananda saraswati krutam